યુવાનોને સ્વાવલંબી બનાવવા માટે નાબાર્ડ પુરસ્કૃત SDAU રૂરલ બિઝનેસ ઇન્કયૂબેશન સેન્ટરને બનાસકાંઠા કલેકટરશ્રી દ્વારા આર્થિક સહાય અપાઇ

વિશ્વનું ૬૬% જેટલું યુવાધન આપણા ભારત દેશમાં છે, ત્યારે આ યુવાનોને સ્વરોજગારી આપવામાં અને દેશને આગળ લઈ જવામાં સ્ટાર્ટ-અપનો ફાળો ખૂબ જ અગત્યનો છે. ગુજરાતને બેસ્ટ સ્ટાર્ટ-અપ પર્ફોર્મર રાજ્ય તરીકે એક આગવી ઓળખ આપવામાં આવી છે. વર્ષ ૨૦૪૭ સુધી ભારતને મહાસત્તા બનાવવાના પ્રધાનમંત્રીશ્રી નરેન્દ્રભાઈ મોદીના ઉદેશ્ય થકી પ્રગતિ થાય તે માટે સ્ટાર્ટ-અપ ક્ષેત્રે ગુજરાત અને ગુજરાતના યુવાનો પોતાનો હિસ્સો વધારી રહ્યા છે.

SDAU RBIC સ્ટાર્ટ-અપ્સને એક નવીન તથા સફળ દિશા આપવા માટે જાણીતું છે. જેના ભાગરૂપે થોડા સમય પહેલા વ્યવસાયની તકોથી ભરપૂર એવા બનાસકાંઠા જિલ્લામાં સ્ટાર્ટ-અપ ઇકો-સિસ્ટમને વેગ આપવાની જવાબદારી બનાસકાંઠા જિલ્લાના કલેક્ટરશ્રીએ નાબાર્ડ પુરસ્કૃત એસડીએયુ રૂરલ બિઝનેસ ઇન્કયૂબેશન સેન્ટરને આપી હતી.
જે અંતર્ગત આ સેન્ટર દ્વારા બનાસકાંઠા જિલ્લાની તમામ મહાવિદ્યાલયો ખાતે અભ્યાસ કરતાં વિદ્યાર્થીઓ માટે પહેલ સ્વરૂપે “i-talk સેન્સિટાઇઝેશન વર્કશૉપ” ની શુભ શરૂઆત કરવામાં આવી છે. આ વોર્કશોપમાં દરેક વિધ્યાર્થીને સ્ટાર્ટ-અપની શરૂઆત કેવી રીતે કરવી, ફંડિંગ તથા ટેકનિકલ સપોર્ટ કેવી રીતે મેળવવો તેના પર માર્ગદર્શન પૂરું પાડવામાં આવે છે. તેમજ આ ઇન્કયૂબેશન સેન્ટર દ્વારા મળતા લાભો વિષે વિસ્તૃત માહિતી નિષ્ણાતો દ્વારા પૂરી પાડવામાં આવે છે.

આ પહેલને વધારે વેગ મળી રહે તે માટે બનાસકાંઠા જિલ્લા કલેક્ટરશ્રી વરુણકુમાર બરનવાલે નાબાર્ડ પુરસ્કૃત એસડીએયુ રૂરલ બિઝનેસ ઇન્કયૂબેશન સેન્ટરને ૫ લાખ રૂપિયાની નાણાકિય સહાય પ્રોત્સાહન સ્વરૂપે આપેલ છે. જે આજની યુવાપેઢીને પ્રેરણારૂપ નિવડે તેમજ આવનાર સમયમાં વધુમાં વધુ સ્ટાર્ટ-અપ ચાલુ થઈને આપણો ભારત દેશ વિશ્વની સર્વશ્રેષ્ઠ ઇકોનોમી તરીકે નીખરી આવે તેવી શુભેચ્છા કલેક્ટરશ્રીએ નાબાર્ડ પુરસ્કૃત એસડીએયુ રૂરલ બિઝનેસ ઇન્કયૂબેશન સેન્ટરને પાઠવી હતી